Aurtengo Altzako onena, TODOR AZURTZA izan da.

IZENBURUA: Ad libitun: hitz arinak.
Doinua: Horra sei bertso kale I / Zaldi baten bizitza

• 1 –
  Zortzi bertsotakoa
  gaur ofizioa,
  ad-lib edo libreko
  marmarioa;
  ikusiaz munduan
  dugun tentsioa,
  horretaz aritzea
  da nire zioa;
  deklamazioa,
  deklarazioa,
  disertazioa,
  alokuzioa;
  denetik egiteko
  dut desioa.

• 2 –
  Ziurtasunez lepo
  gu bizi garela,
  nola onartu dena
  dela kiniela;
  aldakor den munduan
  behar da kautela,
  ustea ezustean
  bihur leike bela;
  ingumen koktela,
  ametsen fardela,
  norberak kartzela
  buruan duela;
  ziur da soilik ezer
  ziur ez dela.

• 3 –
  Begiak arimaren
  mirail omen dira,
  guretan ez al dugu
  galdu diztira;
  egun guztia gabiltz
  pantailei begira,
  sareetan loturik
  galduz perspektiba;
  hainbeste intriga
  eta tirabira,
  gauza bat argi da,
  “Like” baten harira,
  barne ekaitza jartzen
  da agerira.

• 4 –
  Gezurrezko mundu bat
  nahi digute saldu,
  egizko datuekin
  izanda malgu;
  iruzur kanpainetaz
  inor ez da salbu,
  sen ona ta logika
  baitira pattaldu;
  geroaz gogaldu,
  usterik ez galdu,
  egia azaldu,
  egia ahaldu,
  libre bere hegoak
  ditzan zabaldu.

• 5 –
  Elkarbizitza dugu
  hauspotzen den hitza
  herri abegikorren
  zinezko giltza;
  bizikidetza denez
  kulturez anitza,
  nolatan bertakoa
  zapalduz gabiltza?
  Gure_elkarbizitza
  ez al da desditxa,
  euskarazko hitza
  ez denez baldintza
  erderaz derrigorrez
  behar da mintza.

• 6 –
  Ekaitza gizartean
  tximista ta ostotz,
  aritu beharko da
  zuzen ta zorrotz;
  gurea iragarriz
  gabiltzala uros,
  kanpotik datozkigu
  hainbat hitz eta hots;
  ikasteko asmoz,
  adibideok, hots!
  kaixa inglesez box,
  ta azeria fox,
  faxista aldiz dugu
  gazteleraz vox.

• 7 –
  Mundua hankaz gora
  astiro doala,
  ez al da erruduna
  hor mendebala?
  kapitalismoak du
  eragin zabala,
  berekoi izatea
  bihurtuz normala;
  giza arrakala,
  prefosta kausala,
  handitzen doala,
  non dago morala?
  Besteek egin behar
  guk ez bezala.

• 8 –
  Ad-lib bertso hauetan
  egin dut kritika,
  barka norbait nahigabe
  badut kilika;
  baina gertakizunei
  arreta jarrita,
  ezin batek gor egin
  begiak itxita;
  mundua hautsita
  daukagu antsika,
  gaurtikan hasita
  konpon daigun, tita!
  denok historiarekin
  baitugu zita.
  
  Postdata: bi bokalen arteko diptongoa _ ikurraz adierazita dago.