Aurtengo irabazlea IÑIGO LEGORGURU ARREGI izan da.

 T(R)O(N)PATUZ

DOINUA: Baneza eta banitu (Unai Agirre)

1

Olinpiaden erdian

finalera, igerian

sartzearen loterian

pozik ez dut aurpegian.

Sailkatu arren, logelan nago

probaren ordutegian

lehiaketara ez naiz azaldu

ta deika dauzkat sendian …

Guztiz urduri aurkitzen naiz gaur

urakanaren begian

nik ezagutzen ez nuen ni bat

utzi baitut agerian. (BIS)

3

Lau urtez behin, normalean

BERRIAko azalean;

garaipenen itzalean

“biba!” ta “gora!”-k kalean.

Garaikurrak ta kopak pilatuz

doaz nire apalean

ta dominekin pasiatzen naiz

hartuz haiek magalean.

“Dena biribil!” diote fan-ek

oihuz, luze-zabalean …

baina biribil irtendakoak

sartu nau espiralean! (BIS)

5

Kate motzeko larrean

garaipenen aparrean

inor ez bada aurrean

kritikatuz, marmarrean.

“Anek lau Keler edan ditu gaur,

denak trago bakarrean!”

“Ikerrek berriz, pare bat kilo

hartu ditu paparrean …”

Taldekideok sarri amaitu

izan dugu liskarrean

elkarren zaintza praktikatzean,

elkar zaindu beharrean. (BIS)

2

Beijing edo Urumean

uren gogortasunean

txikitatik jardunean …

Baina ez nintzen ume han!

Sakrifikatuz, mina gorpuzten

etengabe podiumean

besteek soilik gozatzen zuten

nire ikuskizunean.

Baina gaurkoan, fokuak nigan

iltzatu diren unean

ze erru daukat zuntz haustura bat

izan badut … garunean? (BIS)

4

Literako burukia

izerdi hotzez bustia

negar, malko ta mukia:

“Ni munduaren uzkia!”

Haur-nerabe hark beranduegi

ikusi du eguzkia

izan ninteken errebeldea,

hippya edo punkya …

Hau al da nire buruari gaur

zor diodan errukia?

Uretan bizi joanez galdu

dut nire bizi guztia. (BIS)

6

Instagram-en naiz mitoa:

Eder, ahots eztikoa,

baina neketan itoa

esan berri dut: “Nahikoa!”

Like-otasunen erlijioan

ez naiz denen begikoa

haterrek beti behatz puntekin

zorrozten dute miztoa!

Sare sozialak itxi ditut ta

hau emaitza komikoa:

Orain ezer ez erakustea

dugu pornografikoa. (BIS)

7

Ni berritu hau babesten

krisialdi hau dut ezten

asmo berriak amesten …

ez dakit zenba litezken!

Nigan murgilduz ikasi nahi dut

nire burua berresten

buru-lanetan lanak burutuz

arnasberriturik, hezten.

Eguneroko epikotasun

txiki guztiak goresten

normaltasuna ez dadin izan

betirako salbuespen. (BIS)

8

Barruan nahiko bertigo

sentitzean, ez naiz fido

zalantzek hainbat lan ildo

eskaintzean … ez da giro!

Kontraesanen kudeaketan

saiatuta goxokiro

jada txapeldun ez dut izan nahi,

irabazle naiz egingo!

Gailur berrirantz aldapa behera

joan nahi nuke astiro

top-aren top-a zapaldu gabe

topatu nadin berriro. (BIS)